کابل؛ د ترکیې او ایران پر پوله په واوره کې بند پاتې ۱۴ هېوادوال د درملنې لپاره روغتونونو ته ولېږدول شول
چهارشنبه، ۱۶ شعبان ۱۴۴۷
د افغاني سرې میاشتې عمومي رئیس ښاغلي شيخ الحدیث شهاب الدین دلاور په مرکزي روغتون کې د هغو ۱۴ تنو ناروغانو د روغتیايي وضعیت ليدنه وکړه، چې څو ورځې وړاندې د ایران او ترکیې سرحدي سیمه کې په واوره کې بند پاتې شوي وو.
ښاغلي دلاور د مرکزي روغتون، وزیر محمد اکبر خان او ځانګړو ځواکونو د روغتونونو له متخصصو روغتياپالانو سره تر لیدنې او مشورې وروسته اړوندو مسؤولینو ته لارښوونه وکړه؛ څو د ناروغانو د وضعیت له مخې پنځه تنه په وزیر محمد اکبر خان، پنځه تنه د ځانګړو ځواکونو او پاتې ۴ تنه د افغاني سرې میاشتې مرکزي روغتون کې د اغېزمنې درملنې په پار بستر کړي. نوموړي همدا راز د سرې میاشتې روغتياپالانو ته سپارښتنه وکړه، چې د نورو ناروغانو ترڅنګ د دغو هېوادوالو درملنې ته ځانګړې پاملرنه وکړي او د هغوی روغتيايي حالت له نږدې وڅاري.
د يادولو وړ ده، چې د عمومي رئيس د ځانګړي شفقت له مخې هر ناروغ سره لس زره افغانۍ نغدي مرسته هم وشوه.
