کابل؛ د افغاني سرې میاشتې ۷۲ کارکوونکي له روزنیزو پروګرامونو فارغ شول
چهارشنبه، ۸ محرم الحرام ۱۴۴۸ هـ.ق
د افغاني سرې میاشتې د کارکوونکو چارو ریاست د ظرفیت لوړونې آمریت له لوري د دې ادارې په مرکزي دفتر کې د بېلابېلو ریاستونو ۷۲ کارکوونکو ته د سواد زدهکړې ، کمپیوټر، حسن خط او انګلیسي ژبې په برخو کې روزنیز پروګرامونه ترسره او د فراغت سندونه ورکړل شول.
په همدې مناسبت جوړه شوې غونډه کې د افغاني سرې میاشتې عمومي رئیس ښاغلي شیخالحدیث شهابالدین دلاور، د نوموړي مرستیال ښاغلي حافظ عزیزالرحمن، د پوهنې وزارت استازي ښاغلي مولوي محمد ابراهیم محمدي او د دې ادارې یو شمېر مسؤولینو او کارکوونکو ګډون کړی و.
د غونډې په پیل کې د افغاني سرې میاشتې عمومي رئیس د کارکوونکو د ظرفیت لوړونې او مسلکي ودې په برخه کې د کارکوونکو چارو ریاست هڅې وستایلې او ویې ویل، چې د کارکوونکو علمي او مسلکي وړتیاوو ته پاملرنه د ادارې د پرمختګ او د خدمتونو د کیفیت د ښه والي لپاره ځانګړی اهمیت لري.
نوموړي زیاته کړه، چې کارکوونکو ته د دندو ترڅنګ د زدهکړو او مهارتونو د ترلاسه کولو زمینه برابرول د بشري سرچینو د پیاوړتیا لپاره یو مهم ګام دی او کولی شي د خدمتونو په اغېزمنتیا او د کاري چارو په ښه ترسره کېدو کې مثبت بدلون راولي.
ورپسې د افغاني سرې میاشتې مرستیال د علم، پوهې او مهارتونو پر ارزښت خبرې وکړې او د کارکوونکو چارو ریاست یې وهڅاوه، چې د ظرفیت لوړونې او مسلکي روزنې دا ډول پروګرامونه لا پراخ او دوامداره وساتي. نوموړي له کارکوونکو وغوښتل، چې له دغو فرصتونو څخه اعظمي ګټه واخلي او د خپلو مسلکي وړتیاوو د لوړولو لپاره لا زیاتې هڅې وکړي.
له بلې خوا، د پوهنې وزارت استازي ښاغلي مولوي محمد ابراهیم محمدي د افغاني سرې میاشتې له لوري د کارکوونکو د روزنې او ظرفیت لوړونې پروګرامونه ارزښتناک وبلل او ویې ویل، چې زده کړه او مهارتونه د فردي او اداري پرمختګ بنسټ جوړوي. نوموړي د سواد زدهکړې او مسلکي روزنې د پروګرامونو د دوام او پراختیا ملاتړ څرګند کړ او ټینګار یې وکړ، چې د کارکوونکو علمي او مسلکي وړتیاوې د خدمتونو د کیفیت په لوړولو کې مهم رول لري.
ورپسې د افغاني سرې میاشتې د ظرفیت لوړونې آمر ښاغلي دوکتور عبدالعلیم احمدزي د یادو کورسونو د مودې او ګډونوالو په اړه معلومات وړاندې کړل او ویې ویل، چې دغه روزنیز پروګرامونه د کارکوونکو د مسلکي وړتیاوو د لوړولو او د خدمتونو د کیفیت د ښه والي په موخه ترسره شوي دي.
نوموړي څرګنده کړه چې دغه روزنیز پروګرامونه د یوې ټاکلې مودې په اوږدو کې په بریالیتوب سره ترسره شول چې له مخې یې ۱۸ تنو د سواد زدهکړې، ۱۰ تنو د انګلیسي ژبې، ۳۰ تنو د کمپیوټر او ۱۴ تنو د حسن خط په برخو کې زده کړې بشپړې کړې.
په پای کې فارغو شویو کارکوونکو ته د فراغت سندونه ووېشل شول او مراسم په دعا سره پای ته ورسېدل.
افغاني سره میاشت هڅه کوي د روزنیزو او ظرفیت لوړونې پروګرامونو له لارې د خپلو کارکوونکو مسلکي وړتیاوې لا پیاوړې او د بشري خدمتونو د وړاندې کولو کیفیت لا ښه کړي.
