ډنمارک سور صلیب د کونړ زلزله ځپلو سره ۳ میلیونه امریکایي ډالره مرسته کوي
سې شنبه، ۱۶ ربیع الأول ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور په افغانستان کې د ډنمارک سره صلیب د رواني ناروغانو برخې له مسئولې آغلې نیوس سره د کونړ ولایت زلزله ځپلو ته د بشري مرستو برابرولو او لاسنیوي په موخه وکتل.
کتنه کې عمومي رئیس د کونړ ولایت ۱۰۰۰ زلزله ځپلو کورنیو ته د افغاني سرې میاشتې له لوري د لنډ مهالې سرپناه، روغتیایي خدمتونو، پخو خوړو د وېش، څښاک پاکو اوبو، بریښنایي سیستم او ورځني ژوند برخه کې د برابرو شوو سهولتونو سربېره د کابل، هرات، کندهار، مزار شریف او ننګرهار ولایتونو په رواني مرکزونو کې ناروغانو ته د وړاندې کېدونکو خدمتونو په اړه معلومات وړاندې کړل او دې برخه کې یې د پراخو همکاریو غوښتنه وکړه.
اغلې نیوس د کونړ ولایت زلزله ځپلو وګړو د لاسنیوي موخه د ۳ میلیونه امریکایي ډالرو د مرستې ژمنه وکړه او ډاډ یې وړاندې کړ، چې د رواني ناروغانو د پالنې او درملنې برخه کې به هم له افغاني سرې میاشتې سره خپلو همکاریو ته دوام ورکړي.
