پنجشېر ولایت کې د افغاني سرې میاشتې له لوري ۶۰۰ کورنیو ته خوراکي مرسته وویشل شوه!
د پنجشېر ولایت په آبشار ولسوالۍ کې نن د روان کال د لیندۍ پر ۳۰مه د افغاني سرې میاشتې له لوري د وروستیو جګړو زیانمنو کړو او بې سرپرسته کورنیو ته اته قلمه خوراکي مرسته وویشل شوه.
یاده مرسته د افغاني سرې میاشتې د تفتیش د رییس مولوي محمد نسیم احمدي، د افغاني سرې میاشتې د پېښو د رییس عبدالرحمان کلانتري، پنجشېر ولایت کې د افغاني سرې میاشتې د نمایندګۍ د رییس شیر اغا باور او د یادې ولسوالۍ د سیمه ییزو مسوولینو په شتون کې وویشل شول، چې هرې کورنۍ ته ۵۰ کیلو اوړه، ۲۴.۵ کیلو وریژې، ۱۰ لیتره غوړي، ۵ کیلو بوره، ۷ کیلو لوبیا، ۱ کیلو شین چای، ۳ کیلو مالګه او ۱ پاکټ BP5 بیسکویټ وویشل شول.
د یادولو وړ ده، چې په یاده ولسوالۍ کې له وروستیو پېښو وروسته دا لومړی ځل و، چې د افغاني سرې میاشتې له لوري مرسته وویشل شوه.
