هرات!
د افغاني سرې میاشتې سرپرست عمومي رئیس هرات ولایت کې د زنده جان ولسوالۍ له زلزله ځپلو سیمو لیدنه وکړه! د افغاني سرې میاشتې سرپرست عمومي رئیس مولوي مطیع الحق خالص نن د دوشنبې په ورځ د ربیع الاول پر ۲۳مه د هرات ولایت اړوند زنده جان ولسوالۍ زلزله ځپلو سیمو ته لاړ او هلته یې زلزله ځپلو وګړو سره له نږدې لیدنه ترسره کړه. ښاغلي مولوي مطیع الحق خالص د یاد سفر په لړ کې د زلزله ځپلو، بې سرپرسته او بې کوره وګړو د هستوګنې او ورته د لومړنیو خدماتو وړاندې کولو په پار درې پڼډ غالي جوړ کړل. د یادو درېیو پڼډ غالو(نایب رافع پڼډ غالي، کشکک پڼډ غالي او سیا اب پڼډ غالي) د جوړښت چارې، چې د افغاني سرې میاشتې د سرپرست عمومي رئیس په لاس پیل شوې، په کې به افغاني سره میاشت زلزله ځپلیو وګړو ته اړوندې ټولې بشري اسانتیاوې چمتو کړي. دا راز نوموړي په یاد سفر کې په سیمه کې د یو شمېر بنسټونو له مسؤلینو سره لیدنې وکړې او له هغوی څخه یې د زلزله ځپلو وګړو او کورنیو د لاسنیوي په برخه کې په لویه کچه د خدماتو هیله وکړه. د یادونې وړ ده، چې د افغاني سرې میاشتې سرپرست عمومي رئیس د زلزله ځپلو او زیانمنو کورنیو او وګړو د ثبت او سروې پروسه له نږدې وڅارله، څو معلومه کړي، چې سیمه کې په کومه کچه بشري مرستو ته اړتیا ده او له نړیوالو بنسټونو څخه په کومه کچه د لاسنیوي او مرستې غوښتنه وکړي.
