نن یو ځل بیا زابل ولایت کې د افغاني سرې میاشتې له لوري له ۱۰۰ اړمنو کورنیو سره مرسته وشوه!
نن د روان ۱۴۰۰ لمریز کال د مرغومي پر ۱۱مه زابل ولایت کې د افغاني سرې میاشتې په ریاست کې د افغاني سرې میاشتې او د قطر او کویت د سرو میاشتو له لوري په ګډه له ۱۰۰ جنګ ځپلو، وچکالۍ ځپلو، بې ځایه شویو او بې سرپرسته کورنیو سره د خوراکي او غیرخوراکي توکو مرسته وشوه.
په یاده مرسته کې ۲۰ کیلو اوړه، ۱۰ کیلو وريژې، ۵ کیلو دال، ۵ کیلو بوره، ۵ لیتره غوړي، چای او يو نظافتي کیټ شامل دي. په پام کې ده په څو ورځو کې دننه به په زابل ولایت کې ټولټال ۱۰۰۰ اړمنو کورنیو ته د قطر او کویت د سرو میاشتو له لوري چمتو شوې مرسته د افغاني سرې میاشتې له لوري وویشل شي.
تېره ورځ هم د افغاني سرې میاشتې له لوري د مرکز قلات په سرخکان سیمه کې ۱۵۰ او یوه ورځ وړاندې میزانه ولسوالۍ کې ۳۵۰ کورنیو ته یاده مرسته ویشل شوې وه.
