ننګرهار؛ ۱۱۴۰ زلزله ځپلې کورنۍ د نږدې ۱۷۵ ټنه خوراکي توکو له مرستې برخمنې شوې

چهارشنبه، ۱۷ رجب ۱۴۴۷
د ننګرهار ولایت د دره نور ولسوالۍ په بېلابېلو سیمو کې له ۱۱۴۰ زلزله ځپلو کورنیو سره د افغاني سرې میاشتې د عمومي رئیس، ښاغلي شیخ الحدیث شهاب الدین دلاور په هدایت، ۱۷۴.۹۹۰ ټنه د خوراکي توکو مرسته وشوه.
یاده مرسته چې د ترکیې سرې میاشتې له لوري چمتو شوې وه، هرې کورنۍ ته اوړه، غوړي، وریژې، بوره، لوبیا، شین چای مالګه او بیسکټ ورکړل شول، چې په ټوله کې ۱۵۳.۵ کیلو کېږي.
سربېره پر دې، هرې کورنۍ یوه د روغتیا ساتنې بسته هم ترلاسه کړه.
دا مرسته له یادو کورنیو سره د بېړنیو او ورځنیو اړتیاوو د پوره کولو په موخه ترسره شوه.
د یادونې وړ ده، چې له هرې کورنۍ سره د ۱۳ زره افغانیو په ارزښت یاده مرسته ترسره شوه، چې نږدې ۱۵ میلیونه افغانۍ کېږي.
کوم ځای کې چې زلزله زیانونه واړوي، هلته افغاني سره میاشت تر هر چا وړاندې د زیانمنو شوو خدمت او لاسنیوي ته ځان رسوي.