کابل کې رمضاني مرستې؛ ۳۰۰ بې وزلو کورنیو ته خوراکي او غیرخوراکي توکي ووېشل شول
پنجشنبه، ۱۶ رمضان ۱۴۴۷
افغاني سرې میاشتې د کابل مرکزي مرستون کې پر ۳۰۰ اړمنو او بې وسه کورنیو بېلابېل خوراکي او غيرخوراکي توکي ووېشل.
ياده مرسته د افغاني سرې میاشتې د عمومي رئیس ښاغلي شيخ الحدیث شهاب الدین دلاور، د نوموړي مرستیال ښاغلي حافظ عزیز الرحمن او د سېلاب خیریه بنسټ د مشر ښاغلي سيد احمد سېلاب په حضور کې مستحقو کورنیو ته ورکړل شوه.
د مرستې د وېش پر مهال عمومي رئیس وویل: افغاني سره میاشت د خپل بشري ماموریت له مخې هڅه کوي؛ څو د هېواد له اړمنو او بې وزلو کورنیو سره پر وخت مرستې وکړي او د بشري فعالیتونو له لارې د هغوی ستونزې تر یوه بریده راکمې کړي، هغه د سېلاب خیریه بنسټ د مرستو مننه وکړه او دا یې د اړمنو او بې وسه کورنیو لپاره یو مهم او پر وخت اقدام وباله.
ورپسې د سېلاب خیریه بنسټ مشر په خپلو څرګندونو کې وویل، چې د ټولنې له بې وزلو او اړمنو خلکو سره مرسته کول د ټولو انساني او اسلامي مسوولیت دی؛ نو په همدې اساس موږ له افغاني سرې میاشتې ټولنې سره په همغږۍ پر یو شمېر اړمنو کورنیو د اختر لپاره نوې جامې او نور د اړتیا وړ توکي ووېشل.
مرسته کې هرې کورنۍ ته ۲۰ کیلو وریژې، ۵ کیلو دال، ۵ لېتره غوړي، ۲ کیلو خرما، ۴ بوتله د لوښو مینځلو مایع، ۵ پاکټه د کاليو مینځلو پوډر، د غاښونو کریم او د سېلاب خیریه بنسټ چمتو شوې مرسته، چې ۱ کیلو چای، ۶ عدده د کاليو مینځلو صابون، د نارینه وو، ښځو او ماشومانو جامې، د ماشومانو بوټ او نور اړین توکي په کې شامل وو؛ ووېشل شول.
