سمنګان کې د افغاني سرې میاشتې له لوري ۶۴۰ کورنیو ته مرسته وویشل شوه
نن د جمعې په ورځ د روان ۱۴۰۰ لمریز کال د سلواغې پر لومړۍ نېټه د افغاني سرې میاشتې له لوري د سمنګان ولایت د مرکز ایبک اړوند د جوی زندان، صوفي کلا، اجمیلي، منګتاش، حسن خېل، ګل قشلاق او ځینو نورو کلیو ۶۴۰ اړمنو کورنیو ته د ترکیې هېواد د سرې میاشتې له لوري د خوراکي او غیر خوراکي توکو شوې مرسته وویشل شوه.
په یاده خوراکي مرسته کې ۵ لیتره غوړي، ۱۰ کیلو لوبیا، ۵ کیلو شین چای، نیمه کیلو مکروني او دوه کیلو بسکوټ شامل دي. په غیر خوراکي مرسته کې ۱ نارینه جمپر، ۴ د ماشومانو جمپرونه، ۱ ښځینه شال، ۱۴ جوړې جرابې او ۴ جوړه دستکشې شاملې دي.
