سرپرست عمومي رئیس د بشري حقونو، آزاديو او بشردوستانه مرستو خيریه بنسټ ( IHH ) له مسئولینو سره وکتل
کابل- پنجشنبه، ۲۹ ذوالحجه ۱۴۴۶
د افغاني سرې میاستې سرپرست عمومي رئیس ښاغلي شیخ الحدیث شهاب الدین دلاور د ترکیې د IHH خیریه بنسټ له مرستیال ښاغلي امره کایا، افغانستان لپاره د بنسټ له مشر ښاغلي سلیمان ایپلي او مل پلاوي سره د دوه اړخیزو همکاريو او اړیکو د پیاوړتیا په پار وکتل.
سرپرست عمومي رئیس له افغاني سرې میاشتې سره د IHH بنسټ د شویو مرستو مننه وکړه او د هېواد په کچه يې پېښځپلو، راستنو شویو کډوالو، اړمنو او بې سرپرستو کورنيو، رواني او د سوري زړه ناروغانو ته د ثابتو کلینیکونو او ګرځنده روغتیایي ټيمونو له لارې د ترسره کېدونکو خدماتو په اړه معلومات وړاندې کړل، دې برخه کې یې د نړیوالو خیریه بنسټونو همکاري مهمه یاده کړه او د مرستو د پراخوالي غوښتنه يې وکړه.
کتنه کې د IHH خیریه بنسټ پلاوي د افغاني سرې میاشتې خدمات او فعاليتونه د اړمنو او بې سرپرسته کورنیو د لاسنیوي او ستونزو ته د ځواب وینې برخه کې مؤثر وګڼل او ژمنه یې وکړه، چې له افغاني سرې میاشتې سره به خپلو همکاریو ته دوام ورکوي.
