سرپرست عمومي رئیس او د نوموړي مرستیال د آسیا پاسيفيک حوزې د آی سي آر سي له سیمه ییز مسئول سره وکتل!
سرپرست عمومي رئیس او د نوموړي مرستیال د آسیا پاسيفيک حوزې د آی سي آر سي له سیمه ییز مسئول سره وکتل!
نن شنبه د شوال میاشتې پر ۲۸مه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور، د نوموړي مرستیال ښاغلي حافظ عزیز الرحمن او د دې خیریه ملي ټولنې سرپرست سکرتر جنرال ښاغلي مولوي روح الله عبدالسلام د آسیا پاسيفيک حوزې د آی سي آر سي نړیوالې کمېټې له سیمه ییز مسئول ښاغلي ریجیس ساویوز او په افغانستان کې د یادې کميټې له مسئولې آغلې کترینا رېټز سره له ګاونډيو هېوادونو بېرته راستنېدونکو کډوالو ته د بشري مرستو برابرولو په موخه وکتل.
لیدنه کې سرپرست عمومي رئیس له افغاني سرې میاشتې سره په ستونزمنو حالاتو کې د اړمنو او پېښځپلو د لاسنیوي برخه کې د آی سي آر سي له دوامداره مرستو مننه وکړه او هم یې له ګاونډیو هېوادونو راستنو شویو کډوالو کورنیو ته د بېړنیو روغتیایي او خوراکي او غیر خوراکي توکو چمتو کولو غوښتنه وکړه.
ورپسې د آسیا پاسيفيک حوزې د آی سي آر سي مسئول له اړمنو، پېښځپلو او په ځانګړې توګه راستنېدونکو کډوالو کورنیو سره د هر اړخیزو مرستو ترسره کولو ډاډ وړاندې کړ او ژمنه یې وکړه چې د دې خیریه ملي ټولنې له لارې به د راستنېدونکو کډوالو بشپړ ملاتړ او لاسنیوی کوي.
همدا ډول نوموړي د افغاني سرې میاشتې او آی سي آر سي ترمنځ د ګډو بشرپاله فعالیتونو ستاینه وکړه او د مرستو د جلب په موخه د دواړو لوریو ترمنځ همغږي یې مهمه یاده کړه.
