د چین هېواد د سره صلیب له لوري افغاني سرې میاشتې ټولنې ته ۱۳۱ ټُنه د خوراکي توکو مرسته وسپارل شوه!
نن چهارشنبه د روان ۱۴۰۰ لمریزکال د کب میاشتې پر ۲۵ مه نېټه د افغاني سرې میاشتې ټولنې د مرکزي دفتر په انګړکې د یو مطبوعاتي کنفرانس په ترڅ کې د چین هېواد د سفیر له لوري د ۱۳۱ ټنه اوړو مرسته د افغاني سرې میاشتې ټولنې رهبرۍ ته د افغاني سرې میاشتې مرستیال ملانورالدین ترابي په شتون کې وسپارل شوه.
یاده مرسته به د پکتیکا ولایت پر ۷۰۰ او د کابل ولایت پر ۶۱۲ اړمنو او بېوزله کورنیو ووېشل شي. د افغاني سرې میاشتې سرپرست رییس ښاغلي مولوي مطیع الحق خالص د چین هېواد له مخکینیو او د سره صلیب له اوسنۍ مرستې مننه وکړه او د ورته مرستو د دوام غوښتنه یې وکړه. نوموړی زیاته کړه، افغانان اوسمهال له سختو ستونزو سره مخ دي او لاسنیوي ته اړتیالري. زمونږ هیله د چین هېواد له سره صلیب او وګړو څخه داده تر څو له افغاني سرې میاشتې سره په بېلابېلو برخو په ځانګړې توګه د روغتیا، مرستونونو او پېښو په برخه کې مرسته وکړي.
په مقابل کې د چین هېواد سفیر ښاغلي وانګ یو د افغاني سرې میاشتې ټولنې له رهبرۍ سره له لیدلو خوښي څرګنده کړه او وویل، داچې افغاني سره میاشت د اړمنو افغانانو لاسنیوی کوي مننه ترې کوو او په دې برخه کې هر ډول مرستې ته چمتو یو.
نوموړي زیاته کړه، د چین هېواد وګړي له افغانانو سره لرغونې اړیکې لري او د افغانانو ستونزې خپلې ستونزې ګڼي، له همدې امله خپلو مرستو ته دوام ورکوو په ځانګړې توګه د اقتصاد او کرهڼې په برخه کې.
دافغاني سرې میاشتې سرپرست رییس ښاغلي مولوي مطیع الحق خالص وویل، د یو ګاونډي هېواد په توګه زمونږ هیله د چین هېواد له سره صلیب او وګړو څخه داده تر څو د نورو هېوادنو د خیریه بنسټونو لکه د ناروې سره صلیب، کاناډا، د قطر او ترکیې سرومیاشتو په څېر له افغاني سرې میاشتې سره مرسته وکړي، ستاسو مرستې به په شفاف ډول پر اړمنو او بېوزلو کو رنیو ووېشل شي.
