د نړیوالو کاري شریکانو له لوري افغاني سرې میاشتې ته ۸ عرادې موټر وسپارل شول
سې شنبه، ۱۵ شعبان ۱۴۴۷
په هېواد کې د افغاني سرې میاشتې د بشري فعالیتونو د پیاوړتیا او پراختیا په موخه، د دې ادارې نړیوالو کاري شریکانو افغاني سرې میاشتې ته ۸ عرادې موټر وسپارل.
په دغو موټرو کې د آی سي آر سي له لوري ۷ عرادې لنډکروزر او د ډنمارک سره صلیب له لوري یو عراده امبولانس شامل دي، چې عمومي رئیس ښاغلي شیخ الحدیث شهابالدین دلاور او د نوموړي مرستیال ښاغلي حافظ عزیزالرحمن ته ورکړل شول.
عمومي رئیس په خپلو خبرو کې د آی سي آر سي او ډنمارک سره صلیب د مرستو مننه وکړه او ډاډ یې څرګند کړ، چې د دغو وسایطو په ترلاسه کولو سره به د سرې میاشتې بشري فعالیتونه لا چټک او اغېزمن شي.
