د ستراتیژيک پلان جوړونې په موخه اداري ناسته وشوه
کابل – دوشنبه، ۱۱ محرم الحرام ۱۴۴۷
د افغاني سرې میاشتې مرستیال ښاغلي حافظ عزیز الرحمن د راتلونکو پنځو کلنو لپاره د یو اغېزمن ستراتیژيک پلان د جوړولو په موخه مرکزي دفتر کې د سکرتر جنرال له مرستیال، سلاکارانو، د رياستونو او مستقلو آمریتونو له مسئولینو سره اداري ناسته وکړه.
ښاغلي حافظ عزیز الرحمن له مسئولینو سره د ستراتیژیک پلان د اهدافو، اغېز او د تطبیق میکانېزمونو په اړه معلومات شریک کړل او د ادارې د چارو د ښه تنظیم لپاره یې پر ګډ کار، همغږۍ او همکارۍ ټینګار وکړ. نوموړي د اداري نظم، پرمختګ او اغېزمنتیا لپاره د ریښتینولۍ، اخلاص او صداقت ارزښتونه مهم وبلل او له ټولو کارکوونکو یې وغوښتل، څو د ورځنیو دندو پر مهال دې اصولو ته ژمن پاتې شي.
ښاغلي حافظ عزیز الرحمن همدا راز د ناستې ګډونوالو ته سپارښتنه وکړه، څو د پخواني ستراتیژیک پلان د تطبیق تجربې و ارزوي، بریالي او نیمګړي اړخونه تشخیص او په نوي جوړېدونکي پلان کې ترې ګټه واخلي.
ناسته کې ګډونوالو د راتلونکي لپاره د یو اغېزمن، ځواب ویونکي او نوښت محوره ستراتیژیک پلان د جوړولو پر موضوعاتو مفصل بحثونه وکړل او هم یې دې برخه کې خپل نظرونه تبادله کړل.
