د افغاني سرې میاشتې پلاوي ترکیې کې د درې خیریه بنسټونو سره د بشري همکاریو د پراختیا په موخه ناستې وکړې

د افغاني سرې میاشتې  پلاوي ترکیې ته د خپل رسمي سفر په ترڅ کې د یاد هېواد په استانبول ښار کې د ۳ نړیوالو خیریه بنسټونو (IHH، حق، او IDDEF) له مسئوینو سره د بشري همکاریو د پراخوالي، ګډو پروژو، اړمنو او بې وزله کورنیو ته د مرستو برابرولو  په موخه جلا جلا ناستې وکړې.

يادو ليدنو کې د افغاني سرې میاشتې د سکرتر جنرال عملیاتي مرستیال ښاغلي مولوي عبداللطیف ثابت، د سکرتر جنرال د پلان او پاليسۍ مرستيال ښاغلي مولوي عزت الله امين او مل پلاوي د بې وزله او اړمنو د وضعیت، د طبیعي او غیري طبیعي پېښو زیانمنو ته د رسېدنې، راستنېدونکو کډوالو ته د بېړنيو بشري مرستو چمتو کولو ، مرستونونو کې د یتیمانو، بې سرپرسته کورنیو  او رواني ناروغانو د ملاتړ او لاسنيوي برخه کې د نړیوالو مرستندویه بنسټونو د همکاريو غوښتنه وکړه.

ورپسې د (IHH، حق، او IDDEF) خیریه بنسټونو مسئولینو د افغانانو د لاسنیوي او ملاتړ برخه کې د افغاني سرې میاشتې خدمات وستایل او ژمنې یې وکړې چې په افغانستان کې به خپل فعالیتونه لا پراخه کړي او زياته يې کړه چې په افغانستان کې د څاه‌ګانو کیندلو، مسجدونو او مدرسو جوړولو، روغتیا، تعلیم، بېړنيو مرستو، یتیمانو پاللو او اقتصادي ملاتړ برخو کې فعالیتونه لري او هڅه کوي له افغاني سرې میاشتې سره په همغږۍ دا فعالیتونه د افغانستان نورو برخو ته هم وغځوي.