د افغاني سرې میاشتې ټولنې د کړنو د ریپوټ وړاندې کونې او روغتونونو ته د زړه په سوري د اخته ۲۰ تنه ناروغ ماشومانو د معرفۍ په پار مطبوعاتي کنفرانس!
د افغاني سرې میاشتې ټولنې سرپرست رئیس ښاغلي مولوي سید صفت الله قریشي د ۲۰۲۱ کال د اته لومړنیو میاشتو د کړنو په اړه د یوه مطبوعاتي کنفرانس په ترڅ کې مالومات وړاندې کړل او ویې ویل:
سرې میاشتې د ۲۰۲۱ کال له پیل څخه د اګیسټ تر پایه په ټول هیواد کې د (۱۴۰) بنسټیزو او ګرځنده روغتیایي مرکزونو له لارې (۱۹۷۹۹۲۷) تنو ته روغتیایي خدمتونه وړاندې کړي دي.
افغاني سرې میاشتې ټولنې د روان کال په لړ کې ۵۷۵ تنه د زړه په سوري اخته ناروغ ماشومان د درملنې په موخه په هېواد د ننه او بهر روغتونونو ته ور پېژندلي دي، چې نن هم په هیواد د ننه روغتونونو ته د ۲۰ تنه ناروغ ماشومانو د ورپیژندني شاهدان یو.
نوموړي زیاته کړه: افغاني سرې میاشتې ټولنې د بشري کړاو د کمښت او همدارنګه د طبیعي او غیر طبیعي پیښو د زییانمنو وګړو د لاسنیوي په برخه کې (۱۹۹۲۲۳) تنو ته خوراکي توکي، غیر خوراکي توکي او نقدي پیسې وېشلي دي او ټاکل شوې د سره صلیب او سرې میاشتې د نړیوال غورځنګ په مرسته «۳۰۰۰۰» نورو وچکالۍ ځپلو کورنیو ته خوراکي او غیر خوراکي توکي برابر شي. همدارنګه به ۴۰ ټنه خوراکي توکي په لنډو ورځو کې د ترکي سرې میاشتې له لوري افغاني سرې میاشتې ته تسلیم شي.
د افغاني سرې میاشتې ټولنې سرپرست رئیس ښاغلي مولوي سید صفت الله قریشي له خیرپاله هیوادوالو، ملي سوداګرو او ملي او نړیوالو بشرپاله بنسټونو څخه هیله وکړه؛ ترڅو د بشري کړاو د کمښت په موخه له ملي ټولنې سره مرسته وکړي.
همدارنګه یې زیاته کړه: د افغاني سرې میاشتې ټولنې په کابل، هرات، ننګرهار، کندهار او بلخ مرستونونو کې ۸۱۰ تنه رواني ناروغان او بې سرپرسته کورنۍ د مشمولینو په توګه ژوند کوي، چې د اعاشې او اباتې ترڅنګ؛ د یادو کورنیو د پرځان بسیایني او ماشومانو د ښوونې او روزنې په موخه یې حرفوي زده کړې او د ښوونې روزنې آسانتیاوي هم موجودې دي.
د یاد مطبوعاتي کنفرانس په پای کې د افغاني سرې میاشتې ټولنې د روغتیایي خدمتونو رئیس ښاغلي ډاکتر محمد سلیم بهره مند د رسنیو پوښتنو ته په ځواب کې و ویل: له نیکه مرغه پدې وروستیو کلونو کې په هیواد د ننه هم د زړه په سوري د اخته ناروغ ماشومانو د درملنې زمینه برابره شوې، موږ د ډيرو ناروغانو د درملنې په موخه لا ډیر مالي ملاتړ ته اړتیا لرو، له بده مرغه زموږ سره راجستر ناروغانو ته د درملنې په موخه د نوبت تر رسیدو پورې له ۲۰ تر ۳۰ سله یې د مرګ تر ګواښ لاندې دي، د افغاني سرې میاشتې ټولنه تل هڅه کوي؛ ترڅو د یادو ناروغانو د ژر تر ژره درملنې په موخه ډیر امکانات برابر کړي.
