د افغاني سرې میاشتې رضاکار ښوونکي وستایل شول
کابل- دوشنبه، ۱۸ محرم الحرام ۱۴۴۷
د افغاني سرې میاشتې د ځوانانو او رضاکارانو ریاست په نوښت، کابل ښار کې د څلورو ښوونيزو مرکزونو (حصه اول، قلعه فتحالله، ارزان قیمت او مرکز) ۲۴ تنه رضاکار ښوونکي د یو ورځني تفریحي او تشویقي پروګرام په موخه سره راټول او وستایل شول.
یاد پروګرام چې د چهلستون په تاریخي بڼ کې د تفریح او نظریاتو د تبادلې په یوې علمي ناستې سره پیل شو، په کې رضاکارو ښوونکو د نوښتونو، تجربو او ښوونیزو لید لورو په اړه خپل نظرونه شریک کړل.
د پروګرام په پیل کې د ځوانانو او رضاکارانو رئیس ښاغلي مولوي عارف الله منصور رضاکارو ښوونکو ته د ښه راغلاست ترڅنګ د بې وزله کورنیو زده کوونکو ته د زدهکړې په برخه کې د هغوی د هڅو او زحمتونو ستاینه وکړه او ژمنه يې وکړه چې افغاني سره میاشت به د رضاکارو ښوونکو ملاتړ ته دوام ورکړي او د دوی په مټ به د بې وزله کورنیو د ماشومانو د زده کړو دا لړۍ همداسې جاري ساتي.
د یادونې وړ ده چې د رضاکارو ښوونکو د ستاینې، هڅونې او یو او بل سره د نظریاتو شریکولو په موخه پیل شوی پروګرام تر علمي بحث او خبرو وروسته پای ته ورسېد.
