بامیان؛ د پېښو مدیریت او د نغدو پیسو د لېږد شپږ ورځنی روزنیز ورکشاپ پای ته ورسېد
سې شنبه، ۲ ربیع الآخر ۱۴۴۸
د افغاني سرې میاشتې له لوري د بامیان ولایت د ولایتي څانګې په ریاست کې ۲۵ تنو رضاکارانو ته د پېښو مدیریت او د نغدو پیسو د لېږد په برخه کې د ظرفیت لوړونې شپږ ورځنی روزنیز ورکشاپ د تصدیق پاڼو په وېشلو سره پای ته ورسېد.
دغه ورکشاپ د ناروې سره صلیب په مالي ملاتړ ترسره شو، چې ګډونوالو ته پکې د بېړنیو پېښو پر مهال د اغېزمنو او چټکو اقداماتو، له زیانمنو وګړو سره د مرستو د څرنګوالي او د نغدو پیسو د لېږد د معیاري اصولو په اړه نظري او عملي روزنه ورکړل شوه.
همداراز، ګډونوالو ته په ناورینونو کې د زیانمنو وګړو د اړتیاوو د معلومولو او د هغوی لپاره د مناسبو خدمتونو د وړاندې کولو په اړه هم معلومات ورکړل شول.
د دې روزنیز ورکشاپ موخه په ناورینونو او بېړنیو حالاتو کې زیانمنو وګړو ته پر وخت او مسلکي خدمتونو د وړاندې کولو لپاره د رضاکارانو د ظرفیت لوړول وو.
افغاني سره میاشت د رضاکارانو د پیاوړتیا له لارې په بېړنیو حالاتو کې د ټولنې د چټک او منظم غبرګون زمینه برابروي.
