افغاني سرې میاشتې د البصر نړیوال خیریه بنسټ روغتیایي خدمات وستایل
دوشنبه، ۵ ذوالحجه ۱۴۴۶
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن تېر ماښام ناوخته د افغاني سرې میاشتې مرکزي دفتر کې د البصر نړیوال خیریه بنسټ له مسئول او ډاکترانو سره د سترګو د درملنې او عملیاتو بهیر له پای ته رسېدو وروسته د مننې په موخه ناسته وکړه.
کتنه کې سرپرست عمومي رئیس د البصر نړیوال خیریه بنسټ څخه مننه وکړه، چې د هېواد په درې ولایتونو ( هرات، بلخ او کابل) کې یې د اړمنو او بې وزله افغانانو د سترګو د عملیات او درملنې برخه کې هڅې وکړې او د هغوی ستونزو ته یې رسېدنه وکړه.
ښاغلي دلاور د هېواد په نورو ولایتونو کې هم د ورته پروګرامونو د تطبیق غوښتنه وکړه او ډاډ یې ورکړ، چې افغاني سره میاشت دې برخه کې د هر ډول اسانتیاوو برابرولو ته چمتو ده.
ورپسې د یاد بنسټ مسئول او ډاکټرانو د افغاني سرې میاشتې د رهبرۍ مننه وکړه، چې دوی ته یې د سترګو د درملنې او عملیات برخه کې د خدماتو وړاندې کولو زمینه برابره کړې وه او ژمنه یې وکړه، چې له افغاني سرې میاشتې سره به همکاریو ته دوام ورکوي.
په پای کې ډاکټرانو ته د مننلیکونو د ورکړې ترڅنګ دواړو لوریو هوکړه وکړه، چې راتلونکي که به د ورته پروګرامونو لړۍ د هېواد نورو برخو ته هم غځوي، څو په وخت د اړمن او زیانمن قشر لاسنیوی او ملاتړ وشي.
