آريانا روغتون ته ۲۲ تنه د ﺯړه په سوري اخته ماشومان د عملياتو او علاج په موخه ور وپيژندل شو!
افغاني سره میاشت تل هڅه کوي؛ ترڅو د هغو بيوﺯلو کورنیو لاسنیوى وکړي، چې د خپلو بچيانو د درملنې وس نلري. په همدې موخه نن پنجشنبه د جمادی الاول پر ۱۴مه افغاني سرې مياشتې یوځل بیا د سوري زړه پر ناروغۍ اخته ۲۲ تنه ماشومان د درملنې په موخه آریانا روغتون ته ورپېژندل. د یادو ناروغانو د ناروغۍ وخامت ته په کتو په هر تن له ۷۵۰ تر ۲۳۵۰ ډالرو لګښت راځي، چې ټول د افغاني سرې مياشتې له لورې ورکول کيږي. د يادونې وړ ده چې د سږکال په جريان کې تر اوسه ۴۱۱ تنه د ﺯړه په سورې اخته ماشومان د افغاني سرې مياشتې په مرسته تداوي شوي او کورنيو ته يي خوشالي وربخښلې.
