د افغاني سرې میاشتې سرپرست عمومي رئيس په افغانستان کې د نړیوال فدراسیون له مسئول سره وکتل.
د افغاني سرې میاشتې سرپرست عمومي رئيس په افغانستان کې د نړیوال فدراسیون له مسئول سره وکتل.
نن سه شنبه د ربیع الآخر د میاشتې پر ۵ مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن په افغانستان کې د نړیوال فدراسیون له مسئول ښاغلي نېسېفور مګېنډي او د نوموړي له نوي ګمارل شوي مرستیال ښاغلي احمد سلیماني سره د دې خيریه ملي ټولنې له لوري د روانو او نویو پروژو د مالي ملاتړ او نړیوال فدراسیون ته د نورو ملي ټولنو له لوري د سپارل شویو نغدي مرستو په تړاو ناسته وکړه.
ناسته کې د افغاني سرې میاشتې سرپرست عمومي رئيس، ښاغلي احمد سلیماني ته په نوې دنده کې د ښه خدمت او کامیابۍ هیله څرګنده کړه او زیاته يې کړه چې د افغانستان اسلامي امارت د مشرتابه له لوري افغاني سره میاشت د غورځنګ د اووه ګونو بنسټيزو اصولو په پام کې نیولو سره ټولو دولتي ادارو ته د یوې خپلواکې ملي ټولنې په توګه ور وپېژندل شوې او هېڅ څوک یې په چارو کې لاسوهنه نه کوي.
ورپسې په افغانستان کې د نړیوال فدراسیون مسئول د افغاني سرې میاشتې پر فعالیتونو خوښي وښوده او د مرستو د دوام ژمنه یې وکړه، نوموړي وويل: " د سنګاپور هېواد له سره صلیب سره د شوې هوکړې له مخې یاد هېواد د سوري زړه ناروغانو د درملنې او چک ډيمونو د جوړونې په برخه کې یو سل او اویا زره ډالر ( ١٧٠٠٠٠) نغدي مرسته او همدا ډول د برتانیې هېواد د سره صلیب له لوري د سوري زړه د ناروغانو لپاره دوه سوه زره ډالر (٢٠٠٠٠٠) موږ ته راسپارل شوي، چې نږدې ورځو کې به افغاني سرې میاشتې ته په واک کې ورکړل شي."
