په افغاني سرې میاشت کې خالي بستونو ته درېیمه ازموینه واخیستل شوه!
د سرې میاشتې د عمومي رییس د لارښوونې پر بنسټ د ۱۴۰۰ لمریز کال د لړم پر ۲۳مه د یکشنبې په ورځ د سرې میاشتې د خالي بستونو لپاره له نوماندانو او هغو پخوانیو کارکوونکو څخه تحریري او تقریري ازموینه د ټاکل شوي کمیسیون له لوري واخیستل شوه، چې غواړي خپل اوسني بستونه تبدیل کړي. په ټاکل شوي کمیسیون کې په ملاتړیزو چارو کې د جنرال سکرتر مرستیال محترم الحاج محمد طیب یوسفزي، د کورنۍ پلټنې رییس مولوي محمد نسیم احمدي، د بشري سرچینو رییس محترم نورالحق یوسفي، د سرې میاشتې د مطبوعاتو امر او ویاند محترم نور اغا صاحبزاده او د بشري سرچینو د ریاست اجرایوي مدیر محمد راوید اعظمي ګډون درلود.
یاده ازموینه چې د خپرونو او اطلاعاتو د ریاست په تالار کې واخیستل شوه؛ په کې ۵۷ تنو ګډون کړی و.
