پنجشېر ته د بشري مرستو د لېږد په موخه سرې میاشتې، کډوالو وزارت او د حوادثو ضد ادارې دویمه ګډه ناسته ترسره کړه!
نن د ۱۴۰۰ لمریز کال د لیندۍ پر ۴مه د سرې میاشتې په مرکزي ریاست کې پنجشېر ولایت ته د بشري مرستو د لېږد په موخه د سرې میاشتې د سرپرست عمومي رییس مولوي مطیع الحق خالص، د سرې میاشتې د سرپرست مرستیال الحاج نورالدین ترابي، د کډوالو د وزارت د لومړي مرستیال حاجي ارسلا خان خروټي او د حوادثو ضد ادارې د پلان او پالیسۍ د رییس محمد صدیق حسني تر منځ ګډه درې اړخیزه ناسته ترسره شوه. په دې ناسته کې پنجشېر ولایت ته د مرستو د وېش پر شفافیت او پر زر اقدام خبرې وشوې. یوه اونۍ وړاندې د لیندۍ پر ۲۷مه نېټه هم پر یاده موضوع له درې واړو لوریو ګډه ناسته ترسره شوې وه. په تازه ناسته کې د سرې میاشتې سکرتر جنرال ډاکتر محمد نبي برهان، د حوادثو رییس او پنجشېر ولایت کې د سرې میاشتې رییس هم ګډون درلود.
۱۱ ورځې وړاندې د وزیرانو د شورا له پرېکړې سره سم افغاني سرې میاشتې ټولنې، کډوالو وزارت او حوادثو ضد ادارې ته دنده وسپارل شوه، چې په پنجشېر ولایت کې اړمنو کورنیو ته په همغږۍ مرستې ورسوي.
