نړیوال فدراسیون د افغاني سرې میاشتې سره په همغږۍ د کډوالو او پېښو د مدیریت لپاره همکاري پراخوي

پنجشنبه، ۶ صَفَر ۱۴۴۷
ښاغلي حافظ عزیزالرحمن په خپل کاري دفتر کې د ملي ټولنو د نړیوال فدراسیون د اسیا-پاسفیک حوزې د روغتیا، اقلیمي بدلون او پېښو د برخې له عمومي مسئول ښاغلي جُی سینګال او مل پلاوي سره د بې سرپرسته کورنیو، طبيعي پېښو زیانمنو او راستنېدونکو کډوالو د لاسنيوي او دې برخه کې د همغږۍ په موخه وکتل.
کتنه کې ښاغلي حافظ عزیزالرحمن د افغاني سرې میاشتې د بشري خدمتونو په اړه د خبرو ترڅنګ د کډوالو ستونزو د حل او د هغوی د ځان بسیاینې لپاره د پراخو همکاریو او اغېزمنو پروژو د پلي کېدو غوښتنه هم وکړه.
ښاغلي جُی سینګال ژمنه وکړه، چې له افغاني سرې میاشتې سره په همغږۍ د بېړنیو مرستو چمتو کولو، د راستنېدونکو کډوالو کورنیو پر ځان د بسیاینې او نورو بېلابېلو پروژو په پلي کولو کې به همکاري وکړي، څو د شته ستونزو او ننګونو په حل کې رغنده ګامونه واخیستل شي.