له «۵۵۰» اړمنو کورنیو سره د افغاني سرې میاشتې ټولنې مرسته!
نن سه شنبه د روان ۱۴۰۰ لمریز کال د وري پر ۱۰ نیټه د افغاني سرې میاشتې ټولڼې په کابل مرستون کې د افغاني سرې میاشتې ټولنې د سرپرست ریسې آغلې ډاکتر نیلاب مبارز، د سکرترجنرال د مرستیال ډاکټر محمد نبی برهان او په افغانستان کې د (رابطه العالم الاسلامی) خیریه بنسټ د مشر ښاغلي قاري نورزمان شرافت په شتون کې د یاد بنسټ له لوري مرسته شوي شپږ قلمه خوراکي او غیرخوراکي توکي: « اوړه، وریژې، غوړي، لوبیا، بوره او کمپلې»؛ پر (۵۵۰) اړمنو کورنیو و ویشل شول.
آغلې ډاکتر نیلاب مبارز د یادو توکو د ویش پر مهال و ویل: د افغاني سرې میاشتې ټولنه د سره صلیب او سرې میاشتې د نړیوال غورځنګ د اووه ګونو بشرپاله اصول (په ځانګړې توګه بې پلوۍ) په رڼا کې تل له بیوزله او اړمنو کورنیو سره مرسته کوي او د (رابطه العالم الاسلامی) خیرپاله بنسټ له مرستو څخه د زړه له کومې مننه کوم.
ورپسې په افغانستان کې د (رابطه العالم الاسلامی) بسټ مسؤل ښاغلي نور زمان شرافت د افغاني سرې میاشتې ټولنې له بشرپاله مرستو مننه وکړه او د ملي ټولنې سره یې د خپلو مرستو له دوام ډاډ ورکړ.
