د پاکستان خیریه بنسټونو له افغاني سرې میاشتې سره ۴۵ ټنه خوراکي مرسته وکړه!
نن د ۱۴۰۰ لمریز کال د لیندۍ پر ۲۳مه نېټه چې له ۱۴۴۳/۵/۱۰ سپوږمیزې نېټې سره سمون خوري؛ د پاکستان هېواد پاک افغان خیریه بنسټ او خديجه موسسې له لوري د ۴۵ ټنه خوراکي توکو مرسته د افغاني سرې میاشتې مسوولینو ته په تورخم پوله وسپارل شوه.
یاده مرسته د پاک افغان خیریه بنسټ او خدیجه موسسې له لوري په تورخم کې د افغاني سرې مياشتې ټولنې د داخلي تفتيش رییس مولوي محمد نسيم احمدي، د ختيځې حوزې ساحوي رییس مولوي حفیظ الدین قمري، د لوژستيک رييس محمد عارف هدایت او د سرې مياشتې ویاند نوراغا صاحب زاده له لوري د تورخم په دروازه کې تسلیم شوه. په یادو توکو کې ۳ ټنه بوره او ۴۲ ټنه اوړه شامل دي.
یاده مرسته پاکستان هېواد ته د افغاني سرې میاشتې د سرپرست عمومي رییس مولوي مطيع الحق خالص د سفر په ترڅ کې هلته له خیریه بنسټونو سره د ګڼو لیدنو له مخې ترلاسه شوې.
