د سعودي عربستان د ملک سلمان خیریه بنسټ له لوري نن دوه الوتکې نوره مرسته هم افغاني سرې میاشتې ته وسپارل شوه!
نن د ۱۴۰۰ لمریز کال د لیندۍ پر ۲۶مه د سعودي عربستان د ملک سلمان خیریه بنسټ د مشرانو له لوري د کابل په نړیوال هوایي ډګر کې د افغاني سرې میاشتې د سرپرست مرستیال محترم الحاج ملا نورالدین ترابي، په کابل کې د سعودي عربستان د سرپرست سفیر مشعل، افغانستان کې د ملک سلمان خیریه بنسټ د مشر فهاد سعد القحطاني او د ملک سلمان د خیریه بنسټ د بېړنیو مرستو د مشر فهد العصيمي په شتون کې دوه الوتکې نوره خوراکي او غیر خوراکي مرسته هم افغاني سرې میاشتې ته وسپارل شوه. په یادو راغلو دوه الوتکو کې شاوخوا ۶۵ ټنه مرسته راوړل شوه.
د سعودي عربستان د ملک سلمان خیریه بنسټ له لوري افغاني سرې میاشتې ته په دې سپارل شوې مرسته کې اوړه، بوره، غوړي، خرما، نخود، وریژې، د پخلنځي لوښي، فرش، ترپال، پشه خانه او یو شمېر نور توکي شامل دي.
ټاکل شوې چې سبا به په دوه الوتکو کې نوره مرسته هم د ملک سلمان خیریه بنسټ له لوري په کابل هوایي ډګر کې افغاني سرې میاشتې ته وسپارل شي او په نېږدې ورځو کې به ۲۰۰۰ ټنه نوره مرسته د یاد خیریه بنسټ له لوري د ځمکې له لارې د تورخم په دروازه کې افغاني سرې میاشتې ته سپارل کېږي.
ټاکل شوې، چې د ملک سلمان خیریه بنسټ له لوري افغانستان ته ټوله را روانه مرسته به افغاني سرې میاشتې ته ورکول کېږي او د افغاني سرې میاشتې له لوري به د هېواد په ګوټ ګوټ کې بېوزلو هېوادوالو ته ویشل کېږي.
