د افغاني سرې میاشتې کارکوونکو ته د پېښو پر وړاندې د چمتووالي ښوونیز ورکشاپ ورکړل شو!
د افغاني سرې میاشتې کارکوونکو ته د پېښو پر وړاندې د چمتووالي ښوونیز ورکشاپ ورکړل شو!
نن چهارشنبه د شعبان میاشتې پر ۲۰مه، د افغاني سرې میاشتې د مرکزي دفتر او سیمه ییزو زونونو رئیسانو او يو شمېر کارکوونکو ته د نړیوال فدراسیون په مرسته له پېښو وړاندې د چمتووالي، د پېښو د ګواښونو د کموالي، د پېښو پر وړاندې د مبارزې او ځواب وینې، بودیجې موندلو او د اسلام مبارک دین له نظره د پېښو پر وړاندې د چمتووالي د ارزښت په برخه کې ۴ ورځنى ورکشاپ د هوا پېژندنې، چاپيریال ساتنې، پېښو پر وړاندې د مبارزې، نړیوال فدراسیون، کډوالۍ نړیوال سازمان او یونیسف ادارو د استازو په شتون کې پای ته ورسېد.
د ورکشاپ په وروستۍ ورځ په عملیاتي چارو کې د افغاني سرې میاشتې د سکرتر جنرال مرستیال ښاغلي مولوي عبداللطيف ثابت په خپلو خبرو کې دا ډول ورکشاپونه له پېښو وړاندې او وروسته د اغېزمنو فعالیتونو ترسره کولو، د طبیعي او غیرې طبیعي پېښو زیانمنو ته د رسېدنې او زیانونو کمولو برخه کې اغېزناک وبلل.
همدا ډول ښاغلي مولوي ثابت له نړیوالو مرستندویه بنسټونو غوښتنه وکړه، څو له افغاني سرې میاشتې سره د یو داسې سیستم په رامنځته کولو کې مرسته وکړي چې د ځينو پېښو د رامنځته کېدو برخه کې له وړاندې د معلوماتو وړاندې کولو ظرفیت ولري، څو له پېښو او زیانونو مخنیوی وشي.
