د افغاني سرې میاشتې مرستیال د افغانستان لپاره د برتانیې د سره صلیب له مسئول سره وکتل
پنجشنبه، ۶ صَفَر ۱۴۴۷
د افغاني سرې میاشتې مرستیال ښاغلي حافظ عزیز الرحمن په خپل کاري دفتر کې د افغانستان لپاره د برتانیې د سره صلیب له مسئول ښاغلي جیرمي سمېت سره کډوالو ته د اوږدمهاله او دوامداره مرستو د چمتو کولو په موخه وکتل.
کتنه کې ښاغلي حافظ عزیز الرحمن د برتانیې له لوري کډوالو سره د شوو مرستو مننه وکړه او زیاته یې کړه، چې راستنېدونکو کډوالو ته باید د ژمي د موسم تر را رسېدو وړاندې د بېړنیو مرستو سربېره د کار زمینه هم برابره شي، څو وکولی شي د ژوند اړتیاوې په خپله پوره کړي.
ورپسې ښاغلي سمېت د افغاني سرې میاشتې له لوري په ترسره کېدونکو خدمتونه خوښي وښوده او ویې ویل، چې راستنېدونکو کډوالو ته به لازمې مرستې برابرې کړي او له بحراني حالت څخه د راوتلو په موخه به هڅه وکړي، څو له کاري شریکانو سره د دوی د ملاتړ په پار ناستې ولري.
