د افغاني سرې میاشتې عمومي سرپرست رییس د نړۍ په کچه د سره صلیب د عملیاتي چارو له لوی رییس سره لیدنه ترسره کړه!
د افغاني سرې میاشتې عمومي سرپرست رییس مولوي مطیع الحق خالص نن د ۱۴۰۰ لمریز کال د لړم پر ۳۰ مه د نړۍ په کچه د سره صلیب د عملیاتي چارو له لوی رییس ډومینیک سټیلهارټ او د نړۍ په کچه د سره صلیب د مالي او لوژستکي چارو له رييسې کاتي سامس سره ولیدل. په دې ناسته کې د سرې میاشتې او سور صلیب پر همغږۍ، ګډ فعالیت، بشري اړتیاو ته په زر لاسرسي، د یو او بل په ملاتړ، د دواړو ټولنو د جوړښت پر ارزښت، روغتیایي اړتیاو او شفافیت خبرې وشوې.
د افغاني سرې میاشتې عمومي سرپرست رییس مولوي مطیع الحق خالص د ناستې ګډونوالو ته وویل، چې دوی اړینه ویني، چې په افغانستان کې له شته خیریه ټولنو او شریکانو سره اړیکو ته وده ورکړي، ترڅو دا کار ددې لامل شي، چې دوی افغانانو ته ښه خدمتونه او مرستې چمتو کړي. نوموړي وویل، چې دی له خپل ټیم سره هڅه کوي په سره میاشت کې داسې شفافیت او اعتماد رامنځ ته کړي، چې د نړۍ په کچه افغاني سره میاشت یوه میثالي بڼه ولري.
محترم مولوي مطیع الحق خالص وویل، چې تېر څلوېښت کلن ناورین د افغانانو روغتیایي، ښوونيز او اقتصادي حالت ډېرې ټيټې کچې ته رسولی او دوی کوښښ کوي، چې له افغانانو سره په دې برخه کې د امکان تر بریده مرستې وکړي، ترڅو ددغې خیریه کارونو له لارې افغانانو ته خدمت وکړي. نوموړي وویل، چې دوی د حوادثو ریاست ته دنده سپارلې، چې د مرستو د وېش لپاره لومړیتوبونه تفکیک کړي او دوی ته یې وسپاري، ترڅو دوی وکړای شي حقیقي اړمونو ګړو ته خپلې روغتیایي او خوراکي مرستې ورسوي.
د سره صلیب د عملیاتي چارو لوی رییس ډومینیک سټیلهارټ وویل، چې سره میاشت باید د نړیوال نهضت قوانینو او ورسره کړو تړونونو ته ژمنه وي. سټیلهارټ ټینګار وکړ، چې د نهضت قوانینو ته ژمنتیا به د دوی ګډو کارونو ته لا نوره لار پرانیزي.
