د افغاني سرې میاشتې سرپرست عمومي رئيس په افغانستان کې د قطر د سرې میاشتې له مسئول سره وکتل!
د افغاني سرې میاشتې سرپرست عمومي رئيس په افغانستان کې د قطر د سرې میاشتې له مسئول سره وکتل!
نن سه شنبه د رجب د میاشتې پر ۲۷مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور ددې خیریه ملي ټولنې په مرکزي دفتر کې په افغانستان کې د قطر د سرې میاشتې له مسئول ښاغلي حسین بوتاني سره د ګډو فعاليتونو پر پراختیا او چټکتیا خبرې وکړې.
سرپرست عمومي رئيس له افغاني سرې میاشتې سره د قطر د سرې میاشتې مرستې وستایلې او د دواړو لوریو ترمنځ یې اوږد مهالې اړیکې د اسلامي ورورولۍ له مخې مهمې یادې کړې او د قطر د سرې میاشتې مسئول ته یې د هر ډول همکارۍ او همغږۍ ډاډ ورکړ.
دا راز ښاغلي دلاور د هېواد په بېلابېلو سیمو کې د بې سرپرسته او اړمنو کورنیو د ژوند د ښه کولو لپاره د لا ډېرو مرستو غوښتنه وکړه.
ورپسې په افغانستان کې د قطر د سرې میاشتې مسئول له افغاني سرې میاشتې سره پر ګډو فعاليتونو خوښي وښوده او د سرې مياشتې کارکوونکو ته د ظرفیت لوړونې په برخه کې یې د ورکشاپ دایرولو سربېره له روژې مبارکې میاشتې وړاندې اړمنو او بېوزلو کورنیو ته د مرستې برابرولو ډاډ څرګند کړ.
