خوست؛ پر ۴۰۰ اړمنو مېرمنو ۴ میلیونه افغانۍ نغدي مرسته ووېشل شوه
سې شنبه، ۶ صفر ۱۴۴۸
د افغاني سرې میاشتې له لوري د خوست ولایت د ځاځي میدان ولسوالۍ په بېلابېلو کلیو کې پر ۴۰۰ هغو اړمنو مېرمنو، چې د خوړو له کمښت سره مخ وې، د نغدي مرستو د لومړي پړاو په ترڅ کې ۴ میلیونه افغانۍ ووېشل شوې.
یاده مرسته د سره صلیب نړیوالې کمېټې په ملاتړ چمتو شوې وه، چې له مخې یې هرې مېرمنې ۱۰ زره افغانۍ ترلاسه کړې.
دغه نغدي مرسته د اړمنو مېرمنو د لومړنیو اړتیاوو د پوره کولو او د خوړو د کمښت د اغېزو د کمولو په موخه ووېشل شوه.
ټاکل شوې ده، چې د همدې پروګرام په دوام به په راتلونکو پنځو میاشتو کې هم یادو مېرمنو ته ورته نغدي مرستې ووېشل شي.
افغاني سره میاشت د خپلو کورنیو او نړیوالو کاري شریکانو په همکارۍ هڅه کوي، چې د خوړو له کمښت سره مخ اړمنو کورنیو ته پر وخت بشري مرستې ورسوي او د هغوی د لومړنیو اړتیاوو په پوره کولو کې اغېزمنه ونډه واخلي.
