هند کې د درملنې وروسته د سوري زړه درې افغان ماشومان هېواد ته راستانه شول
يکشنبه، ١٩ رمضان ١۴۴۷
د افغاني سرې میاشتې له لوري څه موده وړاندې هند ته د درملنې په موخه استول شوي د سوري زړه په ناروغۍ اخته ٣ تنه ماشومان، له بشپړې روغتيا ترلاسه کولو وروسته بېرته هېواد ته راستانه شول.
یاد ماشومان د افغاني سرې میاشتې په همغږۍ د معیاري درملنې لپاره هند ته لېږدول شوي وو، چې هلته یې اړینې طبي معاينې او جراحي عملیات په بریالیتوب سره ترسره شول.
د يادونې وړ ده، چې د دغو ماشومانو د درملنې ټول لګښت د هند حکومت پر غاړه اخيستی و.
افغاني سره میاشت ددې همکارۍ د برياليتوب لپاره په کابل کې د هند سفارت له هڅو مننه کوي.
ټاکل شوې ده په نزدې راتلونکي کې، د هند حکومت او په کابل کې د هند د سفارت په ملاتړ، پاتې هغه ١٢ تنه افغان ماشومان چې د سوري زړه په ناروغۍ اخته دي، د درملنې لپاره هند ته واستول شي.
