کابل؛ د سرې میاشتې د پېنګ پانګ لوبډلې په ګډون د لس لوبډلو تر منځ سیالۍ پیل شوې
چهارشنبه، ۳ رجب ۱۴۴۷
د افغاني سرې میاشتې د ځوانانو او رضاکارانو ریاست اړوند پېنګ پانګ لوبډلې په ګډون د پلازمېنې کابل په ملي جمنازیم کې د یو شمېر ادارو او شرکتونو د لس لوبډلو ترمنځ ۱۴م پړاو سیالۍ د دې ادارې د سپورت او بدني روزنې د آمر ښاغلي جاوید شرفي په شتون کې پیل شوې.
د سیالیو په پرانیست غونډه کې ښاغلي شرفي وویل، چې د دې سیالیو د دایرولو موخه د سپورتي فعالیتونو له لارې هېوادوالو ته د افغاني سرې میاشتې بشري، روغتیايي او ټولنیز خدمتونه ورپېژندل دي. نوموړي زیاته کړه چې سپورت نه یوازې د ځوانانو د فزیکي او ذهني پیاوړتیا لامل ګرځي بلکې د همغږۍ، ورورولۍ او مثبت فکر د ودې لپاره هم مهم رول لري. هغه ګډونوالو ته ډاډ ورکړ چې د سرې میاشتې اداره به تل د سالمو سپورتي پروګرامونو ملاتړ ته دوام ورکړي. یادې سیالۍ چې په ملي جمنازیم کې په پام کې نیول شوي، ۳ ورځې به دوام وکړي.
