د افغاني سرې میاشتې، نړیوال سور صلیب او فدریشن په هکله د پېژندګلوۍ دوه ورځنی ورکشاپ ترسره شو!
د افغاني سرې میاشتې ټولنې د ولایتي چارو د تنظیم ریاست له لوري د نړیوال سور صلیب او فدرېشن په تخنيکي مرسته د افغاني سرې مېاشتې ټولنې، نړیوال سور صليب او د سره صلیب او سرو میاشتو نړیوال فدرېشن د پېژندګلوۍ په هکله د افغاني سرې میاشتې ټولنې په مرکزي دفتر، ساحوي دفاترو او نماینده ګیو کې نویو ګمارل شویو مسولینو ته دوه ورځینی ورکشاپ دایر او ترسره شو.
ورکشاپ پرون د سه شنبې په ورځ د روان ۱۴۰۰ هجري لمريز کال د لیندۍ پر دویمه نېټه د قرآن عظیم الشان په مبارکو آیاتونو پیل شو. وروسته د افغاني سرې میاشتې ټولنې سرپرست رییس الحاج مولوي مطيع الحق خالص ګډونوالو ته سپارښتنه وکړه، چې له دې دوه ورځني ورکشاپ څخه په اعظمي توګه ګټه واخلي ترڅو وکولای شو په ورځنیو چارو کې په پوره پياوړتیا سره د بېوزلو هېوادوالو لاسنيوی وکړو.
وروسته له اجنډا سره سم عملاً د ورکشاپ چارې پیل شوې او ټولو ګډونوالو ته د نړیوال فدرېشن د استازي ډاکټر محمد رفیع، د سره صلیب د استازي آغلې میرمن کترین او د افغاني سرې میاشتې د ټولنې د استازي الحاج عبدالجليل یوسفزي له لوري د غورځنګ تاريخي بهير، نښان، د نښان د کارونې، د ملي ټولنې د مرکزي او ولایتي څانګو مرستندويه کړنې، خوندي لاسرسي او په کړونو کې د ريښتینولۍ او د اصولو مراعاتولو په هکله مفصل مالومات وړاندې شول.
ورکشاپ د افغاني سرې میاشتې ټولنې د مرستیال الحاج ملا نورالدین ترابي په اختتامیه وینا کې نن چهارشنبه ټولو ګډونوالو ته د نوې دندې د مبارکۍ تر څنګ هیله مندي وښوده، چې له دوه ورځني ورکشاپ څخه به یې بشپړه ګته پورته کړې وې، پای ته ورسېد.