کابل؛ پر ۵۰۰ راستنو شوو کډوالو کورنیو ژمنۍ البسه ووېشل شوه
شنبه، ۵ شعبان ۱۴۴۷
د افغاني سرې میاشتې له لوري د کابل ښار په ۲۱ مه ناحیه کې د ژمي له سړې هوا د ځان ساتنې په موخه پر ۵۰۰ راستنو شوو کډوالو کورنیو ژمنۍ البسه ووېشل شوه.
مرسته د افغاني سرې میاشتې د عمومي رئیس ښاغلي شیخ الحدیث شهاب الدین دلاور او د مرستونونو د رئیس ښاغلي مولوي سید احمد بهرمند په حضور کې مستحقو کورنیو ته ورکړل شوه.
د مرستې د وېش پر مهال عمومي رئیس وویل، افغاني سره میاشت هڅه کوي، له بې وزله راستنو شوو او اړمنو کورنیو سره د هغوی اړتیاوو ته په کتو بشري مرستې ترسره کړي؛ څو وکولای شي د ژمي له سړې هوا او بېلابېلو ناروغیو څخه ځانونه خوندي وساتي.
نوموړي دغه مرسته د راستنو شوو کورنیو د بېړنیو اړتیاوو د پوره کېدو برخه کې مهمه وبلله او ډاډ یې ورکړ چې راتلونکي کې به هم د خپلو همکارو بنسټونو په ملاتړ راستنو شوو کډوالو کورنیو سره بشري مرستې ترسره شي.
یاده مرسته کې هرې کورنۍ ته د نارینه وو، ښځو او ماشومانو جمپرونه، جاکټونه، بوټان، جرابې، پړوني او نوره اړینه ژمنۍ البسه ورکړل شوه.
