ننګرهار؛ ۶۷۵ راستنو شوو کورنیو ته روغتیایي بستې ووېشل شوې
یکشنبه، ۷ رجب ۱۴۴۷
د افغاني سرې میاشتې له لوري د ننګرهار ولایت، د مرکز جلالاباد ښار د بېلابېلو سیمو پر هغو ۶۷۵ راستنو شوو کډوالو کورنیو روغتیایي بستې ووېشل شوې، چې په وروستیو کې له پاکستان څخه خپل هېواد ته راستنې شوې وې.
د یادو کورنیو له ډلې ۴۵۰ هغو ته د حفظالصحې او ۲۲۵ نورو کورنیو ته د انساني کرامت بستې ورکړل شوې، څو د دوی د روغتیايي اړتیاوو یوه برخه پوره او بېړنیو ستونزو ته یې رسېدنه وشي.
یادې بستې د حفظالصحې اړین توکي لري، چې موخه یې د ناروغیو مخنیوی، د عامې روغتیا ساتنه او د راستنو شوو کورنیو د ژوند د لومړنیو اړتیاوو پوره کول دي.
افغاني سره مياشت د راستنو شوو کډوالو لاسنیوي او ملاتړ ته بشپړه ژمنتيا لري.
