په چين هېواد کې د افغانستان سره د بشري مرستو او همکاريو د دوام او پياوړتيا په موخه ناسته ترسره شوه
په چين هېواد کې د افغانستان سره د بشري مرستو او همکاريو د دوام او پياوړتيا په موخه ناسته ترسره شوه
نن جمعه د جمادي الأولی د میاشتې پر ٢٧مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور او ورسره مل پلاوي چين هېواد ته د خپل سفر په ترڅ کې د نړيوال فدراسيون د اسيا څانګې له مسٸول ښاغلي الکساندر متيو سره په افغانستان کې د بشردوستانه مرستو او همکاريو د پياوړتيا په موخه ناسته ترسره کړه.
ناسته کې د افغاني سرې میاشتې سرپرست عمومي رئيس ددې خيريه ملي ټولنې د فعاليتونو، لاسته راوړنو او په بېلابېلو برخو کې د خپلو بشرپالو خدماتو په اړه هر اړخيز او تفصیلي معلومات وړاندې کړل، نوموړي په خپلو خبرو کې په افغانستان کې د بشري وضعيت او د نړيوالو مرستندويه ادارو د مرستو د اغيزمنتيا په اړه د وينا ترڅنګ د طبیعي پېښو له امله د زیانمنو د ملاتړ او د ژمي په موسم کې د ناچاره او اړمنو وګړو د لاسنیوي په پار د بېړنیو او اړینو مرستو برابرولو غوښتنه وکړه.
ورپسې ښاغلي متيو د افغاني سرې میاشتې د بشرپالو خدماتو او فعاليتونو د ستاينې ترڅنګ يادونه وکړه چې مونږ د سرې مياشتې د ملاتړ په برخه کې بشپړه ژمنتيا لرو او بشري ستونزو د حل په برخه کې يې د ګډو هڅو او دوامداره مرستو ترسره کولو ژمنه وکړه.
دواړو خواوو د راتلونکي لپاره د ګډو همکاريو په برخه کې د نوو پلانونو په تړاو هم هر اړخیز بحث ترسره کړ.
