کابل؛ د افغاني سرې میاشتې مرکزي مسؤولینو ته د پېښو مديريت په اړه یو ورځنی معلوماتي ورکشاپ ترسره شو
یکشنبه، ۲ ذوالقعده ۱۴۴۷
د افغاني سرې میاشتې د مرکزي دفتر رئیسانو، سلاکارانو او د مستقلو آمریتونو مسؤولینو ته، افغانستان کې د ملي ټولنو نړیوال فدراسیون له لوري د طبیعي او غیر طبیعي پېښو پر وړاندې د اغېزمنې مبارزې او چمتووالي په اړه د پوهاوي یو ورځنی ورکشاپ وړاندې شو.
د ورکشاپ په پرانیسته کې د سکرتر جنرال عملياتي مرستيال ښاغلي مولوي روح الله عبدالسلام د پېښو پر وړاندې د اغېزمنې ځواب وینې او چمتووالي پر اهمیت ټینګار وکړ او دې برخه کې یې د کارکوونکو ظرفیت لوړونه یو مهم او اساسي اقدام وباله.
دغه راز نوموړي زیاته کړه، چې د نیمګړتیاوو اصلاح د ادارې د پرمختګ لامل ګرځي، خو تکرار یې د ادارې چارې ټکنۍ کوي، موږ باید له نیمګړتیاوو د مخنيوي په موخه د چارو ښه والي ته ځانګړې پاملرنه وکړو؛ څو وکولای شو زیانمنو ته پر وخت او غوره توګه خدمتونه وړاندې کړو.
ياد ورکشاپ کې ګډونوالو سره د طبيعي او غیر طبيعي پېښو پر وړاندې د اغېزمنې مبارزې، خدمتونو ارزونې او چمتووالي په اړه لازم معلومات شریک شول.
