پکتیکا کې پر ۲۳۰۰ بېځایه شوو کورنیو ۳۴.۵ میلیونه افغانۍ نغدي مرسته ووېشل شوه
یکشنبه، ۱۱ شوال ۱۴۴۷
د افغاني سرې میاشتې له لوري د پکتیکا ولایت په برمل، شکین او تروو ولسوالیو کې پر ۲۳۰۰ داخلي بېځایه شویو کورنیو ۳۴.۵ میلیونه افغانۍ نغدي مرسته ووېشل شوه.
په مرسته کې هرې کورنۍ ته د لومړنیو اړتیاوو د پوره کولو په موخه ۱۵ زره افغانۍ ورکړل شوې.
د یادونې وړ ده، چې تېره ورځ هم د همدې ولایت په سروبي ولسوالۍ کې پر ۲۰۰ بېځایه شویو کورنیو ۲.۱ میلیون افغانۍ نغدي مرسته وېشل شوې وه.
افغاني سره میاشت له طبیعي پېښو او ناورینونو سره د مخ شوو کورنیو ملاتړ له خپلو مهمو بشري لومړیتوبونو څخه ګڼي.
