نورستان؛ له ۴۶۰ اړمنو کورنیو سره د ۱۰ ټنو په اندازه خوراکي مرسته وشوه

چهارشنبه، ۹ شعبان ۱۴۴۷
افغاني سرې میاشتې د نورستان ولایت، نورګرام ولسوالۍ کې له ۴۶۰ اړمنو او بېوزله کورنیو سره ۱۰.۱۲۰ ټنه د خوراکي توکو مرسته وکړه.
په مرسته کې هرې کورنۍ ته ۲۲ کیلو خوراکي توکي ورکړل شول، چې په کې اوړه، غوړي، بوره، مکروني، تور چای، رُب او نخود شامل وو.
دغه مرسته به د یادو کورنیو د خوراکي توکو د لنډمهاله اړتیاوو په پوره کولو کې اغېزمن رول ادا کړي.
د یادونې وړ ده، چې څو ورځې وړاندې هم د یاد ولایت په دو آب ولسوالۍ کې پر ۴۶۰ اړمنو کورنیو ورته مرسته وېشل شوې وه.