د افغاني سرې میاشتې په کوربتوب د پېنګ پانګ درې ورځنۍ سیالۍ پای ته ورسېدې
شنبه، ۶ رجب ۱۴۴۷
د افغاني سرې میاشتې ټولنې په کوربتوب د اولمپیک او بدني روزنې په جمنازیم کې د پېنګ پانګ د ۱۴م پړاو درې ورځنيو سیاليو د اتلو لوبغاړو د ستاینې او هڅونې په موخه یاد جمنازیم کې د اولمپیک او بدني روزنې عمومي رئیس ښاغلي مولوي احمدالله وثیق، د نوموړي مرستیال ښاغلي حافظ احمد جان، د افغاني سرې میاشتې د سکرتر جنرال عملیاتي مرستیال ښاغلي مولوي روح الله عبدالسلام، رضاکارانو رئیس ښاغلي عارف الله منصور، د سرې میاشتې د مقام سلاکارانو، سپورت او بدني روزنې د آمر او یو شمېر کارکوونکو په شتون کې غونډه ترسر شوه.
غونډه کې د سکرتر جنرال عملیاتي مرستیال وویل، چې افغاني سره میاشت د بشري مرستو ترڅنګ د ځوانانو د سالمو فعالیتونو او ورزشي پروګرامونو ملاتړ هم خپل مسؤلیت بولي. نوموړي زیاته کړه، چې دا ډول سیالۍ د ځوانانو ترمنځ د ورورولۍ او سالم رقابت د پیاوړتیا سربېره د فزیکي او روحي روغتیا په وده کې مهم رول لري. هغه د سیالۍ له ګډونوالو وغوښتل؛ څو تل سپورتي اخلاقو ته ژمن پاتې شي او د هېواد د نوم روښانولو لپاره لا زیاتې هڅې وکړي.
ورپسې د اولمپیک او بدني روزنې عمومي رئیس د افغاني سرې میاشتې له رهبرۍ مننه وکړه چې د یادو سیاليو کوربتوب یې کړی دی، هغه سپورت د ټولنې د یووالي، سالم فکر او مثبت بدلون مهمه وسیله یاده کړه او ډاډ یې څرګند کړ، چې د هېواد په کچه به ورزشي فعالیتونه لا پراخ شي.
ښاغلي وثیق د پېنګ پانګ د سیالیو اتلو لوبغاړو ته مبارکي وویله او زیاته یې کړه، چې د بدني روزنې او سپورت اداره به د ورزشکارانو د ملاتړ او ودې لپاره خپلې هڅې جاري وساتي.
