کونړ کې له ۲۱۰ زلزله ځپلو کورنیو سره د لمریزې برښنا اړوند توکو مرسته وشوه
یکشنبه، ۵ ربیع الآخر ۱۴۴۷
د افغاني سرې میاشتې له لوري د کونړ ولایت، نورګل ولسوالۍ کې د زلزله ځپلو لپاره په جوړ شوي پنډغالي کې له ۲۱۰ زیانمنو شوو کورنیو سره د برښنايي اسانتياوو د برابرولو په موخه د لمریزې برښنا اړوند ۷ قلمه توکو مرسته وشوه، چې په کې هرې کورنۍ ته یو سولري تخته، بطرۍ، باد پکه، کنټرولر، لس متره برقي تار، ۳ بوتله تېزاب او دوه څراغونه ورکړل شول.
د یادونې وړ ده، چې څو ورځې وړاندې هم په یاد پنډغالي کې پر ۶۶ زلزله ځپلو کورنیو د لمریزې برښنا اړوند توکو مرسته وېشل شوې وه.
