آی سي آر سي، افغاني سرې میاشتې سره د بشرپاله فعالیتونو د پیاوړتیا په موخه د ۷ عراده موټرو ژمنه وکړه
دوشنبه، ۳ صَفَر ۱۴۴۷
د افغاني سرې میاشتې مرستیال ښاغلي حافظ عزیز الرحمن، افغانستان لپاره د آى سي آر سي د همکاریو له مسئول ښاغلي ربیع الفقیه سره د خپل کار په دفتر کې د بېرته راستنېدونکو کډوالو د ستونزو، اړتیاوو او د هغوی د ملاتړ لپاره د بشري مرستو د پراختیا په اړه هر اړخیزې خبرې وکړې.
ښاغلي حافظ عزیز الرحمن له ګاونډیو هېوادونو څخه د کډوالو راستنېدو له پیل راهیسې د آی سي آر سي له دوامداره ملاتړ او همکارۍ مننه وکړه او د راستنېدونکو کډوالو د اوسني وضعیت، شته ستونزو او بېړنیو اړتیاوو په اړه معلومات وړاندې کړل. نوموړي د راستنېدونکو کډوالو په پنډغالو کې د لنډمهاله سرپناوو، بېړنیو مرستو او اړینو اسانتیاوو د برابرولو په برخه کې د لا پراخ ملاتړ غوښتنه وکړه.
ښاغلي ربیع الفقیه د کډوالو په تړاو د وروستي معلوماتو په ترلاسه کولو خوښي وښوده او ډاډ یې ورکړ، چې د راستنېدونکو کډوالو د اړتیاوو د پوره کولو په موخه د څښاک پاکو اوبو، نغدي مرستو او روغتیایي خدمتونو د ملاتړ تر څنګ به نزدې راتلونکي کې افغاني سرې میاشتې ته د بشري فعالیتونو د پیاوړتیا په موخه ۷ عرادې لنډکروزر موټرونه وسپاري.
