د راتلونکو پنځو کلونو د نوي ستراتیژیک پلان برخه کې د افغاني سرې میاشتې مسئولینو ته د پوهاوي ورکشاپ ورکړل شو
کابل- چهارشنبه، ۲۸ ذوالحجه ۱۴۴۶ ه ق
د افغاني سرې میاستې د سرپرست عمومي رئیس ښاغلي شیخ الحدیث شهاب الدین دلاور، د نوموړي مرستیال ښاغلي حافظ عزیز الرحمن، په افغانستان کې د ملي ټولنو نړیوال فدراسیون د مرستیال ښاغلي احمد سلیمان او يو شمېر نورو نړيوالو ملي ټولنو د مسئولینو په شتون کې د مرکزي ریاستونو رئیسانو او د مستقلو آمریتونو مسئولینو ته د نوي ستراتیژيک پلان په اړه د پوهاوي یو ورځنی ورکشاپ ورکړل شو.
د یاد ورکشاپ په پرانیسته کې سرپرست عمومي رئیس د ستراتیژيک پلان د موخو او ارزښت په اړه تفصیلي او هر اړخيز معلومات وړاندې کړل او دغه ورکشاپ یې د افغاني سرې میاشتې د فعاليتونو د لا ښه والي، اغېزمنتیا، منابعو د مناسب مصرف او کاري ټيمونو د وړتيا لوړونې برخه کې مهم یاد کړ او د ستراتیژیک پلان جوړونه کې یې په افغانستان کې د بېلا بېلو کاري شريکانو د مسئولینو د هڅو او همکاریو ستاینه وکړه.
له بل لوري په افغانستان کې د نړیوال فدراسیون مرستیال د افغاني سرې میاشتې د ستراتیژيک پلان د ترتیب برخه کې د تخنیکي همکارۍ ډاډ څرګنډ کړ او د کاري ټيمونو د روزنې او ستراتیژيک پلان د لا ښه والي په موخه یې د نورو نړیوالو ملي ټولنو د مسئولینو د مشورو، تجربو او نوښتونو د شریکولو ژمنه وکړه.
ورپسې د افغاني سرې میاشتې مرستیال، طبيعي او غیر طبيعي پېښو ته د ځواب وینې او په ښه شکل د فعالیتونو د تطبیق لپاره د ستراتیژيک پلان د اهمیت او ارزښت په اړه وینا وکړه او د نوي پنځه کلن ستراتیژیک پلان د جوړونې برخه کې یې په افغانستان کې د سره صليب نړيوالې کمېټې، نړیوال فدراسيون او نورو نړیوالو ملي ټولو د همکاریو مننه وکړه.
ورکشاپ کې ګډونوالو ته د ستراتیژيک پلان د موخو، ارزښت، اغېزمنتیا او تطبیق په اړه لازم معلومات ورکړل شوه.
