د افغاني سرې مياشتې سرپرست عمومي رئيس او د ترکيې سرې مياشتې استازي په ګډه هرات کې د بشپړو شويو رغنيزو چارو ليدنه وکړه!
د افغاني سرې مياشتې سرپرست عمومي رئيس او د ترکيې سرې مياشتې استازي په ګډه هرات کې د بشپړو شويو رغنيزو چارو ليدنه وکړه!
نن سه شنبه د رجب د میاشتې پر ۶مه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د ترکیې د سرې میاشتې د سکرتر جنرال مرستیال ښاغلي محمد شکرو هرات ولایت ته د خپل سفر په ترڅ کې د لویدیځ سمیه ییز زون له روغتیایي مرکز، مرستون او د رواني ناروغانو د درملنې او پالنې له ودانۍ څخه، چې د ترکیې د سرې میاشتې په مالي مرسته یې د بیارغونې چارې بشپړې شوې دي، لیدنه وکړه.
ښاغلي دلاور د ترکیې د سرې میاشتې له هر اړخيزې همکارۍ او ملاتړ څخه د مننې ترڅنګ د رواني ناروغانو درملنه، بې سرپرستو مېرمنو او د اړمنو افغانانو د لاسنیوي برخه کې د ترکیې سرې میاشتې د سکرتر جنرال له مرستیال څخه د مرستو د دوام او پراختیا غوښتنه وکړه او د افغانستان او ترکیې ترمنځ دوه اړخيزې اړیکې یې د اسلامي اخوت پر بنسټ مهمې او اغیزمنې وبللې.
ورپسې د ترکیې د سرې میاشتې استازي یاده لیدنه کې د افغاني سرې میاشتې له لوري د ترسره کېدونکو خدماتو ستاینه وکړه او دې برخه کې یې د پوره همکارۍ ډاډ څرګند کړ.
