کندهار کې د سرې میاشتې له لوري نن یو ځل بیا ۵۰۰ کورنیو ته د خوراکي توکو مرسته وویشل شوه!
د کندهار ولایت د ښار په نهمه ناحیه کې د افغاني سرې میاشتې له لوري نن یو ځل بیا هغو ۵۰۰ اړمنو کورنیو ته مرسته وویشل شوه، چې وچکالۍ او جنګ ځپلي او یا له خپلو کورونو بې ځایه شوي.
یاده مرسته د تېرو ورځو په تعقیب نن د روان ۱۴۰۰ لمریز کال د لیندۍ پر ۲۷مه د سرې میاشتې له لوري د جنوب زون د رییس ښاغلي اختر محمد خادم او د کندهار د نمایندګۍ د رییس ښاغلي فیض الله فیضي په شتون کې وویشل شوه. ټاکل شوې ده، چې په روانو څو ورځو کې به په کندهار ولایت کې ۱۵۰۰ نورو اړمنو کورنیو ته هم هره ورځ د ۵۰۰ خوراکي توکو بستې وویشل شي.
په یاده مرسته کې اته قلمه خوراکي مواد شامل دي، چې په کې ۵۰ کیلو اوړه، ۲۴.۵ کیلو وریژې، ۱۰ لیتره غوړي، ۵ کیلو بوره، ۷ کیلو لوبیا، ۱ کیلو شین چای، ۳ کیلو مالګه او ۱ پاکټ BP5 بیسکویټ شتون لري. یاده مرسته د نړیوال فدراسیون له لوري چمتو شوې او ټاکل شوې، چې له مهالوېش سره سم به له کندهار وروسته په هلمند ولایت کې ۳۰۰۰ اړمنو کورنیو ته او همدا رنګه په ارزګان کې به هم ۳۰۰۰ اړمنو کورنیو ته وویشل شي.
