کابل ولایت کې د افغاني سرې میاشتې ټولنې له لوري ۵۵۰ کورنیو ته مرسته ووېشل شوه!
نن پنجشنبه د روان ۱۴۴۳ سپوږمیزکال د رمضان المبارک میاشتې پر ۲۰ مه نېټه د افغاني سرې میاشتې ټولنې له لوري د کابل ولایت د نماینده ګۍ په انګړ کې د کابل د بېلابېلو ناحیو ۵۰ کورنیو او موسهي ولسوالۍ ۵۰۰ اړمنو او بېوزله کورنیو ته د قطر د سرې میاشتې د روژې پکېج مرسته ووېشل شوه.
د یادونې وړ ده، چې په یاده مرسته کې د هرې کورنۍ لپاره ۵۰ کیلو اوړه، ۵ لیټره غوړي، ۲۴.۵ کیلو وریژې، ۵ کیلو بوره، ۱ کیلو چای، ۱ کیلو مالګه او ۲ کیلو خُرما شامل وو؛ چې د افغاني سرې میاشتې ټولنې د مرستیال ملانورالدین ترابي او قطر د سرې میاشتې د استازي په شتون کې ووېشل شول.
د افغاني سرې میاشتې مرستیال د مرستو د وېش پر مهال د قطر هیواد د سرې میاشتې له استازو څخه مننه وکړه او دوی یې لا زیاتو مرستو ته و هڅول.
