کابل ولایت کې د افغاني سرې میاشتې ټولنې له لوري (۱۲۲۵) اړمنو او بېوزلو کورنیو ته د مرستو د وېش لړۍ پیل شوه!
نن یکشنبه د روان ۱۴۰۰ لمریزکال د کب پر ۲۹ مه نېټه د افغاني سرې میاشتې ټولنې له لوري د کابل ولایت د نمایندګۍ په انګړ کې د بېلابېلو ناحیو د ۱۲۲۵ اړمنو او بېوزله کورنیو له ډلې ۳۰۰ کورنیو سره د خوراکي توکو مرسته ترسره شوه.
په یاده مرسته کې د چین هېواد د سره صلیب له لوري ۵۰ کیلو اوړه او دافغاني سرې میاشتې ټولنې له لوري ۴ چکۍ صابون، ۵ کیلو بوره او ۲ کیلو مالګه چمتو شوي وه، د شمال لویدیځ مرکزي زون رییس ښاغلی مولوي حیات الله "صاپی" د کابل نماینده ګۍ د سرې میاشتې رییس ښاغلی مولوي عبدالله "حماد" اړوندو کار کوونکو او رضاکارانو په شتون کې پر یادو اړمنو او بېوزلو کورنیو ووېشل شوه.
د یادونې وړده، چې د دې مرستو لړۍ به هره ورځ ۳۰۰ کورنیو ته د مرستو په وېش سره پای ته ورسېږي.
