په افغانستان کې د ام ټي ان مخابراتي شرکت د خیریه بنسټ له لوري افغاني سرې میاشتې سره پینځه میلیونه افغانۍ نغدي مرسته ترسره شوه!
نن سه شنبه د ذوالحجه الحرام پر ۶مه په افغانستان کې د ام ټي ان مخابراتي شرکت د خیریه بنسټ له لوري افغاني سرې میاشتې ته د خوست او پکتیکا زلزله ځپلو کورنیو سره د مرستې په موخه ۵ میلیونه افغانۍ نغدي مرسته وسپارل شوه.
یاده نغدي مرسته د ام ټي ان مخابراتي شرکت د رییس ښاغلي هدایت الله ذاهد په لاس د افغاني سرې میاشتې سرپرست عمومي رییس ښاغلي مولوي مطیع الحق خالص ته وسپارل شوه.
د مرستې د سپارلو پر مهال د افغاني سرې میاشتې سرپرست عمومي رییس ښاغلي مولوي مطیع الحق خالص د یاد خیریه بیسټ له استازو مننه وکړه او یاد عمل یې له پېښځپلو او اړمنو کورنیو سره د مرستو او لاسنیوي په برخه کې یو غوره عمل وباله.
ورپسې د ام ټي ان شرکت رییس ښاغلي هدایت الله ذاهد په خپلو خبرو کې وویل؛ افغاني سره میاشت یواځينۍ د باور وړ مرجع ده، چې کولای شي مرستې په پوره رونټيا سره تر زلزله ځپلو او اړمنو کورنیو ورسوي.
